بھارت کے ساتھ امن کی کوششیں اور بھارتی ونگ کمانڈر ابھینندن کو رہا کرنے پر سوشل میڈیا صارفین کی جانب سے وزیراعظم پاکستان عمران خان کو امن کا نوبل انعام دیے جانے کا مطالبہ کیا جا رہا تھا اور حکومتی وزراء بھی اس حوالے سے بھرپور مہم چلاتے نظر آ رہے تھے۔
اس سب معاملے میں وزیراعظم عمران خان اب تک خاموش تھے البتہ اب انہوں نے ٹوئٹر کے ذریعے اپنے پیغام میں کہا ہے کہ میں امن کے نوبل انعام کا حقدار نہیں۔ نوبل انعام کا مستحق وہ شخص ہوگا جو کشمیری عوام کی امنگوں کی روشنی میں تنازعہ کشمیر کا حل تلاش کرے گا اور برصغیر میں امن انسانی ترقی کی راہ ہموار کرے گا۔
وزیراعظم کے اس بیان کو ٹویٹر صارفین نے سراہا ہے اور مسئلہ کشمیر حل کرنے کے لیے ان کی خواہشات کی تعریف کی ہے۔
صارفین کا کہنا ہے کہ وزیراعظم نے اس ٹویٹ کے ذریعے ان تمام لوگوں کو بھی جواب دے دیا ہے جو کئی دنوں سے یہ پروپیگنڈا کر رہے تھے کہ وزیراعظم عمران خان اس انعام کو لینے کے متمنی ہیں۔
