نیوزی لینڈ کی وزیراعظم جیسنڈا آرڈرن نے کہا ہے کہ جمعہ کو نیوزی لینڈ کے تمام شہری مسلمانوں کو خراج عقیدت پیش کریں گے اور کرائسٹ چرچ واقعے میں شہید ہونے والے افراد کی یاد میں جمعہ کو سرکاری ذرائع ابلاغ پر اذان نشر کی جائے گی۔
اس کے علاوہ جمعہ کو کرائسٹ چرچ سانحے کی یاد میں پورے ملک میں دو منٹ کی خاموشی بھی اختیار کی جائے گی۔
کیوی وزیراعظم کا کہنا تھا کہ ہماری خواہش ہے کہ مسلم کمیونٹی کو سپورٹ کریں تاکہ وہ دوبارہ مساجد میں آئیں۔
وزیراعظم نے حملے کے بعد جائے وقوعہ پر پہنچنے والے اہلکاروں سے ملاقات بھی کی اور ان کی حوصلہ افزائی کی۔
واضح رہے کہ نیوزی لینڈ کی وزیراعظم جیسنڈا آرڈرن نے ملکی حالات کے باعث آسٹریلیا کا طے شدہ دورہ منسوخ کردیا ہے۔ ان کا کہنا تھا کہ تمام عالمی رہنماؤں کو نسل پرستی اور انتہا پسندی کے خلاف یکجا ہونا پڑے گا اور یہ سب کی ذمہ داری ہے۔
