مقبوضہ کشمیر‘ بھارتی فوج کے ہاتھوں ایک اور نوجوان شہید

سری نگر (اے پی پی) مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران ضلع بارہمولہ کے علاقے اوڑی میں محاصرے اور گھر گھر تلاشی کے دوران ایک اور نوجوان کو شہید کردیا۔ دریں اثنا قابض انتظامیہ نے حریت فورم کے چیئرمین میر واعظ عمرفاروق کو سری نگر میں گھر میں نظر بند کر دیا ۔ کل جماعتی حریت کانفرنس کے چیئرمین سید علی گیلانی نے خود کو کشمیر یونیورسٹی سری نگر میں منعقدہ ایک کتب میلے میں شرکت سے روکنے کے قابض انتظامیہ کے اقدام کی مذمت کرتے ہوئے کہا ہے کہ انہیں میلے میں شرکت کے لیے گھر سے باہر آنے کی اجازت نہیں دی گئی۔ کشمیر میڈیا سروس کے مطابق سید علی گیلانی نے سری نگر سے جاری ایک بیان میں کہا کہ مقبوضہ علاقے میں سیاسی ہی نہیں بلکہ معاشرتی، مذہبی اور علمی سرگرمیوں پر بھی پابندی لگادی گئی ہے اور سروں پر پہرے تو پہلے ہی تھے لیکن اب زبانوں پر بھی تالے لگائے جا رہے ہیں۔ انہوں نے کشمیر یونیورسٹی طلبہ کے نام اپنے پیغام میں کہا کہ ظلم وستم کی اس سیاہ رات کی سحر ضرور ہوگی۔ انہوں نے طلبا و طالبات سے اپیل کی کہ وہ قوم کے گرانقدر اثاثے اردوکی حفاظت کریں‘ آنے والی نسلوں کو اردو سے روشناس کرکے ان کو اس کی اہمیت اور افادیت سے آگاہ کریں اور اس کو کمزور کرنے کی کسی بھی سازش اور منصوبے کے خلاف صف آرا ہوجائیں۔