عمران خان کی تقریر ،بھارت بوکھلا گیا 6 کشمیری شہید

سری نگر/ڈھاکا/نئی دہلی/اسلام آباد (خبر ایجنسیاں) وزیراعظم عمران خان کے اقوام متحدہ کی جنرل اسمبلی میں بھارت کا مکروہ چہرہ بے نقاب ہونے پر مودی سرکار بوکھلاہٹ کا شکار ہو گئی ہے اور مقبوضہ وادی میں کشمیریوں کی نسل کشی پر اتر آئی، قابض فوج نے ایک ہی روز میں 7کشمیری نوجوانوں کو شہید کردیا۔کشمیر میڈیا سروس کے مطابق ضلع گاندر بل ، شوپیاں اور رام بن کے اضلاع میں گھر گھر تلاشی کے دوران نشانہ بنایاگیا۔کشمیر میڈیا سروس کے مطابق بھارتی فورسز نے 3 نوجوانوںکو ضلع گاندر بل کے علاقے نارہ ناگ جبکہ دیگر 3 کو جموں کے ضلع رام بن کے علاقے بٹوٹ میںمحاصرے اور تلاشی کی کارروائیوں کے دوران شہید کیا۔قبل ازیں بٹوٹ میں ایک حملے میں بھارتی فوج کا ایک اہلکار ہلاک جبکہ ایک اور زخمی ہو گیا۔ آخری اطلاعات آنے تک ان علاقوںمیں بھارتی فوجی کارروائیاں جاری تھیں۔ بھارتی فورسزنے ضلع شوپیاں کے علاقے آرونی میں بھی ایک نوجوان سجاد احمدملک کو گرفتارکرکے دوران حراست شہیدکیا۔ علاوہ ازیں سری نگر میں لوگوں نے جمعے کی شب اقوام متحدہ کی جنرل اسمبلی سے وزیر اعظم عمر ان خان کے خطاب کے بعد بھر پور جشن منایا۔ عمران خان نے مسلسل محاصرے اور ذرائع مواصلات کی بندش کے باعث کشمیریوںکو درپیش مشکلات کو بھر پور اور مؤثر انداز میں اجاگر کیا۔بھارتی فورسز کی بھاری نفری تعیناتی کے باوجود عمرا ن خان کی تقریر ختم ہوتے ہی کئی مقامات پر لوگ گھروں سے باہر آئے اور پٹاخے چلائے اور خوشی سے رقص کیا۔ کشمیریوں نے پاکستان اور آزادی کے حق میں اور بھارت کے خلاف فلک شگاف نعرے لگائے۔ قابض انتظامیہ نے لوگوں کو مزید مظاہروں سے روکنے لیے سرینگر میں پابندیاں مزید سخت کر دیں۔ مقبوضہ وادی کشمیر میں بھارتی پابندیوں کے باعث آج مسلسل 55ویں روز بھی نظام زندگی مفلوج رہا اور دکانیں کاروباری مراکز اور تعلیمی ادارے بند جبکہ سڑکوں پر ٹریفک کی آمد و رفت معطل رہی۔مقبوضہ وادی کشمیراور جموں خطے کے مسلم اکثریتی علاقوںمیں موبائل فون ، انٹرنیٹ سروسز اور ٹیلی ویژن نشریات مسلسل بند ہیںجس سے لوگوں کو شدید مشکلات کا سامناہے۔ بھارتی قبضے اور مقبوضہ کشمیر کی خصوصی حیثیت کے خاتمے کے خلاف ڈوڈہ،بھدرواہ اور کشتواڑ میں مکمل ہڑتال کی گئی۔ جموں شہر میںانڈو تبتین بارڈر پولیس کے ایک افسر نے اپنی سروس رائفل سے گولی مارکر خودکشی کرلی۔ اس واقعے سے جنوری 2007ء سے مقبوضہ کشمیر میں خودکشی کرنے والے بھارتی فوجی اور پولیس اہلکاروںکی تعداد بڑھ کر442ہوگئی ہے۔ کل جماعتی حریت کانفرنس آزاد کشمیر شاخ کے کنوینر سید عبداللہ گیلانی نے اسلام آباد میں صحافیوں سے گفتگو کرتے ہوئے کہا کہ پاکستان کے وزیر اعظم عمران خان نے اقوام متحدہ کی جنرل اسمبلی سے اپنے خطاب میں کشمیریوں کے جذبات کی مؤثر انداز میں ترجمانی کی ہے۔ انہوںنے کہاکہ عمران خان نے اپنے آپ کو مظلوم کشمیریوں کا حقیقی سفیر ثابت کیا ہے۔ ادھر بنگلا دیش کے دارالحکومت ڈھاکا میں لوگوں کی بڑی تعداد نے مقبوضہ کشمیر میں بھارتی ریاستی دہشت گردی کے خلاف احتجاجی مارچ کرتے ہوئے بھارت سے علاقے میں پابندیاں اور مواصلاتی نظام کی بندش ختم کرنے کا مطالبہ کیاہے۔ مقبوضہ کشمیر کے سابق کٹھ پتلی وزیر اعلیٰ اور انڈین نیشنل کانگریس کے رہنما غلام نبی آزاد نے نئی دہلی میں ایک انٹرویو میں کہا کہ مقبوضہ کشمیرکی صورتحال افسوسناک ہے اوروادی کشمیر میں ایک بڑا بحران جنم لے رہا ہے جہاں غریبوں کے پاس کھانے کو کچھ نہیں ہے۔ بھارتی نژاد امریکی رکن کانگریس پامیلاجیاپال اور دیگر 13 ارکان کانگریس نے ایک مشترکہ بیان میں بھارتی وزیر اعظم نریندر مودی پر زوردیا ہے کہ وہ مقبوضہ کشمیر میں انسانی حقوق کی پامالیاں بنداور مواصلاتی ذرائع کی بندش ختم کریں۔
6شہید