حیدرآباد،تنخواہوں کی عدم ادائیگی پر واسا ملازمین کی ہڑتال جاری

حیدر آباد (اسٹاف رپورٹر) واسا ملازمین کی تنخواہوں کی عدم ادائیگی کیخلاف ایچ ڈی اے مہران ورکرز یونین کی جانب سے پیر کے روز بھی علامتی بھوک ہڑتال اور احتجاج کا سلسلہ بھی جاری رہا۔ اس موقع پر محنت کشوں سے خطاب کرتے ہوئے سی بی اے یونین کے رہنماؤں ارشاد علی، اسلم عباسی، عاشق قنبرانی، ولیم نذیر نے کہا کہ ادارے کی بے حس انتظامیہ ہمیں انتہائی احتجاجی اقدام پر مجبور کررہی ہے۔ اس بار اگر ہم نے قدم اٹھایا تو دمادم مست قلندر ہوگا اور فاقہ کش بدحال محنت کشوں کے ہاتھ ظالم انتظامیہ کے گریبانوں میں ہوں گے۔ کمشنر حیدر آباد ہمارے احتجاج کا نوٹس لیں، بصورت دیگر احتجاج کا دائرہ وسیع کیا جائے گا۔ ملازمین کو ذہنی اذیت سے دوچار کیا جارہا ہے جب ملازمین کے بچے گھروں میں فاقہ کشی کا شکار ہوں گے، تو وہ کس طرح اپنے فرائض ادا کرپائیں گے، لیکن اس کے باوجود ملازمین ہر ممکن کوشش کرکے شہر میں نکاسی وفراہمی نظام کو برقرار رکھے ہوئے ہیں لیکن انتظامیہ کو بھی اس کی بدحالی کا نوٹس لینا چاہیے۔