مقبوضہ کشمیر: ریاستی دہشت گردی ، آپریشن، دھماکے،5افراد ہلاک

سری نگر(مانیٹرنگ ڈیسک)مقبوضہ کشمیر میں ریاستی دہشت گردی جاری۔آپریشن۔دھماکے۔5 افراد ہلاک۔تفصیلات کے مطابق قابض بھارتی فوج نے ایک بار پھر ریاستی دہشت گردی کا مظاہرہ کرتے ہوئے نام نہاد سرچ آپریشن کے دوران 3 کشمیری نوجوانوں کو شہید کر دیا۔کشمیر میڈیا سروس کے مطابق جنت نظیر وادی کے ضلع پلواما میں سرچ آپریشن کے دوران 3 نوجوانوں کو شہید کر دیا گیا، بھارتی فوج نے نوجوانوں کی لاشوں کو لواحقین کے حوالے کرنے سے انکار کردیا اور شہید ہونے والوں کو دہشت گرد ثابت کرنے کی مذموم کوشش کی۔عینی شاہدین اور علاقہ مکین قابض بھارتی فوج کے دعوئوں کی قلعی کھولتے ہوئے احتجاجاً سڑکوں پر نکل آئے اور پر امن مظاہر کیا جسے سبوتاژ کرنے کے لیے قابض بھارتی فوج نے آنسو گیس کی شیلنگ اور ہوائی فائرنگ کی جب کہ پیلٹ گن کا بے دریغ استعمال کیا گیا جس کی زد میں آکر درجنوں مظاہرین زخمی ہوگئے۔علاقہ مکینوں کا کہنا تھا کہ بھارتی فوج نے داخلی و خارجی راستوں کو بند کرکے سرچ آپریشن کے دوران گھر گھر تلاشی کے نام پر چادر و چار دیواری کا تقدس پامال کیا۔ خواتین کی بے حرمتی، بزرگوں کی تذلیل اور بچوں کو ڈرایا دھمکایا جب کہ قانونی تقاضوں کو پورا کیے بغیر 4 نوجوانوں کو گرفتار کرکے اپنے ساتھ لے گئے۔ بھارتی فوجیوں نے سوپور قصبہ میں پانچ کشمیر ی نوجوانوں کو گرفتارکرلیاہے۔کشمیرمیڈیا سروس کے مطابق بھارتی پولیس نے باسط احمد ، ثقلین مشتاق، جہانگیر احمد اوربابرسمیت پانچ نوجوانوں کو قصبے کے مختلف علاقوں میں چھاپوں کے دوران گرفتارکیا۔ ادھرضلع کپوارہ کے علاقے کیرن میں بھارتی فوج کا ایک اہلکار نایک پیرا رام معمول کے گشت کے دوران پھسل کر ایک گہرے نالے میں گرکر ہلاک ہوگیا ہے۔علاوہ ازیں مقبوضہ کشمیر میں بارودی سرنگ کے دو مختلف دھماکوں میں 2 افراد ہلاک اور 7 زخمی ہوگئے۔بھارتی میڈیا کے مطابق پہلا دھماکا مقبوضہ کشمیر کے ضلع اننت ناگ کے علاقے بودسگام میں ہوا، جہاں دیہاتیوں کے اْن کے گھروں میں آبادکاری کی سرکاری مہم جاری تھی۔ دھماکے میں 2 افراد ہلاک اور 4 زخمی ہوگئے۔دوسرا دھماکا حضرت بل کے علاقے میں کشمیر یونیورسٹی کے نزدیک ایک مارکیٹ میں ہوا، دھماکا ہلکی نوعیت کا ہونے کے باعث 6 افراد زخمی ہوئے جنہیں اسپتال منتقل کیا گیا. زخمیوں کی حالت خطرے سے باہر بتائی جا رہی ہے۔سیکورٹی حکام نے ابتدائی بیان میں دھماکوں کو گرنیڈ حملے قرار دیا تھا بعد ازاں موقف تبدیل کرتے ہوئے بتایا کہ ہلکی نوعیت کے یہ دھماکے بارودی سرنگ کے تھے جس کا مقصد خوف و ہراس پیدا کرنا تھا۔