حیدرآباد:بجلی کی بد ترین لوڈشیڈنگ نظام زندگی مفلوج

حیدرآباد(اسٹاف رپورٹر) حیدرآباد میں بجلی کی بند ترین لوڈ شیڈنگ‘ طویل غیر اعلانیہ لوڈ شیڈنگ نے نظام زندگی مفلوج کردیا، لطیف آباد کے بیشتر علاقوں میں صبح دس بجے سے بجلی کی سپلائی معطل کی گئی جو کہ دوران نماز جمعہ بھی بحال نہیں ہوئی اور رات آٹھ بجے بحال ہوئی جبکہ سٹی کے مختلف علاقوں گاڑی کھاتہ‘ کچا قلعہ‘ کھر کھو محلہ‘ اسٹیشن روڈ‘ گول بلڈنگ‘ لجپت روڈ‘ مکی شاہ سمیت دیگر علاقوں میں سہ پہر سے بند ہونے والی بجلی کی سپلائی رات تک بحال نہیں ہوئی تھی حیسکو انتظامیہ نے کسی بھی جگہ طویل لوڈ شیڈنگ کی پیشگی کوئی اطلاع نہیں دی تھی جبکہ بجلی نہ ہونے کے باعث بیشتر علاقوں میں پانی کی قلت‘ نماز جمعہ میں مشکلات کا سامنا رہا شہریوں نے حیسکو کی نااہلی پر سخت رد عمل دیتے ہوئے حیسکو کو چیف سے مطالبہ کیا ہے کہ وہ فوری طور پر حیسکو کا قبلہ درست کریں بصورت دیگر عوام خود درست کردیں گے ۔