پشاور، مسافر ٹرین کا ریت سے بھرے ٹرالر سے تصادم

پشاور (آئی این پی) کراچی آنے والی عوامی ایکسپریس ریت سے بھرے ٹرالر سے ٹکرا گئی تاہم تمام مسافر معجزانہ طور پر محفوظ رہے۔ پشاور کے قریب اضاخیل میں جلد باز ڈرائیور نے عین اس وقت اپنی ریت سے بھری ٹریکٹر ٹرالی کو پٹڑی کی دوسری جانب لے جانے کی کوشش کی جب کراچی آنے والی عوامی ایکسپریس وہاں سے گزر رہی تھی۔ نتیجے میں ٹرین ٹرالی سے ٹکرا گئی تاہم ڈرائیور کی مستعدی کے باعث بڑا حادثہ نہیں ہوا اور تمام مسافر محفوظ رہے۔ حادثے کے دورابن ٹریکٹر ٹرالی میں سوار تین افراد میں سے 2 نے چھلانگ لگادی جبکہ ایک شخص ایسا نہ کرسکا جس کے باعث وہ زخمی ہوگیا۔ زخمی کی شناخت الطاف کے نام سے ہوئی، جسے طبی امداد کے لیے لیڈی ریڈنگ اسپتال منتقل کیا گیا۔