این ایل ایف کا جائز مطالبہ

مزدوروں کی نمائندہ تنظیم نیشنل لیبر فیڈریشن نے ملک کے نجی اور صنعتی شعبوں میں کام کرنے والے محنت کشوں کی حالت کی طرف توجہ دلاتے ہوئے مطالبہ کیا ہے کہ مزدوروں کی کم از کم تنخواہ بیس ہزار روپے مقررکی جائے ۔ ملک میں جس حساب سے مہنگائی میں اضافہ ہوا ہے ، اس لحاظ سے تو بیس ہزار روپے میں بھی ایک خاندان تو کیا ایک فرد کا گزارا مشکل ہے ۔ وفاقی اور صوبائی حکومت دونوں کا دعویٰ مزدور دوست ہونے کا ہے ، اس کے باوجود نہ تو وفاقی حکومت نے اور نہ ہی حکومت سندھ نے اس طرف کوئی توجہ دی جو انتہائی افسوسناک ہے۔ اب جبکہ نیشنل لیبر فیڈریشن کراچی نے اس اہم مسئلے کی طرف توجہ دلائی ہے تو ہم سمجھتے ہیں کہ ملک کی دیگر سیاسی ، سماجی اور فلاحی تنظیموں کو بھی اس جانب توجہ کرنی چاہیے اور نیشنل لیبر فیڈریشن کی آواز میں آواز ملانا چاہیے ۔ وفاقی اور سندھ حکومت دونوں اس جانب توجہ کریں کہ یہ سیاسی نہیں بلکہ انسانی مسئلہ ہے ۔محنت کشوں کے لیے نہ صرف کم ازکم تنخواہ میں مناسب اضافہ کیا جائے بلکہ ان کے لیے صحت اور تعلیم جیسی بنیادی سہولتوں کی فراہمی کو بھی یقینی بنایا جائے ۔