اسلام آباد ہائیکورٹ،شہزاد اکبر کی تعیناتی کیخلاف سماعت آج ہوگی

اسلام آباد (آن لائن) اسلام آباد ہائیکورٹ میں مشیر برائے احتساب مرزا شہزاد اکبر کی تعیناتی کے خلاف درخواست آج (منگل کو)سماعت کے لیے مقرر کر دی گئی۔ چیف جسٹس اسلام آباد ہائی کورٹ جسٹس اطہر من اللہ درخواست پر سماعت کریں گے، چیئرمین
ایسٹ ریکوری یونٹ کے خلاف درخواست میں کہا گیا ہے کہ مشیر برائے احتساب مقرر کرنا نیب کا کنٹرول بالواسطہ وزیراعظم آفس منتقل کرنا ہے شہری سید پرویز ظہورکی طرف سے دائر درخواست میں مرزا شہزاد اکبر کی بطور چیئرمین ایسٹ ریکوری یونٹ تعیناتی کو بھی چیلنج کرتے ہوئے استدعا کی گئی ہے کہ مرزا شہزاد اکبر کی تعیناتی کا 22 جولائی کا نوٹی فکیشن غیر قانونی قرار دیا جائے۔ درخواست میں کہاگیاکہ مرزا شہزاد اکبر وزیراعظم کے مشیر اور وفاقی وزیر کے برابر عہدہ رکھتے ہیں تعیناتی مسابقتی عمل اور اسامی مشتہر کیے بغیر غیر شفاف انداز میں کی گئی، استدعاہے کہ مرزا شہزاد اکبر کو وفاقی وزیر کا عہدہ استعمال کرنے سے روکا جائے، مرزا شہزاد اکبر کی تعیناتی غیر قانونی قرار دے کر وصول کی گئی تنخواہیں، الاؤنسز اور مراعات واپس لی جائیں،شہزاد اکبر کا تقرر اقربا پروری، مفادات کا ٹکراؤ اور وزیراعظم کے حلف کی خلاف ورزی ہے،مرزا شہزاد اکبر اپنے سیاسی آقا کی خوشنودی کے لیے کردار ادا کر رہے ہیں نیب خود مختار ادارہ ہے جو نیب آرڈی نینس کے تحت کام کرتا ہے شہزاد اکبر کو وزیر اعظم کا مشیر برائے احتساب مقرر کرنا نیب کا کنٹرول بالواسطہ وزیراعظم آفس منتقل کرنا ہے۔