شہادت حسینؓ مسلمانوں کو ایثار، صبر اور قربانی کا درس دیتی ہے

ڈگری (نمائندہ جسارت) رکن سندھ اسمبلی میر طارق علی خان تالپور نے کہا ہے کہ محرم الحرام کا مہینہ اور شہادت حسینؓ مسلمانوں کو ایثار، صبر اور قربانی کا درس دیتی ہے۔ حسینؓ کی لازوال قربانی باطل اور ظالم کے سامنے ڈٹ جانے اور ظلم کے سامنے استقامت سے کھڑا رہنے کا درس دیتی ہے۔ حسینؓ نے جام شہادت کا رتبہ پاکر باطل کو نشان عبرت بنایا ہمیں بھی آج ایسے ہی جذبے، ایثار اور قربانی کی ضرورت ہے۔ انہوں نے کہا کہ قدرتی آفات کے سامنے کسی کا زور نہیں چلتا، حالیہ بارشوں سے تحصیل ڈگری اور جھڈو بری طرح متاثر ہوئے ہیں۔ اس موقع پر ہمیں صبر اور ہمت سے کام لینا چاہیے۔ سندھ حکومت مشکل کی اس گھڑی میں عوام کے دکھوں کا مداوا کرے گی اور انہیں اکیلا نہیں چھوڑیں گے۔ انہوں نے کہا کہ نقصانات کی تفصیلات جمع کی جارہی ہیں تاکہ بارش سے ہونے والے نقصانات کا ازالہ کیا جاسکے۔ آخر میں انہوں نے تمام مسلمانوں سے اپیل کی کہ وہ محرم الحرام کے موقع پر اتحاد کا ثبوت دیں۔