شرجیل ،اعظم خان اوراحسان کی فٹنس مایوس کن قرار

لاہور(جسارت نیوز) رمیز راجہ نے شرجیل خان، اعظم خان اور احسان علی فٹنس کو مایوس کن قرار دیدیا۔سابق کپتان کا کہنا ہے کہ تینوں بیٹسمین باصلاحیت ہیں، لاک ڈاون کی وجہ سے طویل تعطل کے دوران خاصا وقت میسر ہونے کے باوجود یہ کھلاڑی اپنی فٹنس میں بہتری نہیں لاسکے،ان کو سمجھنا چاہیے کہ اس انداز میں کیریئر آگے بڑھانے کا موقع نہیں ملے گا۔انہوں نے کہا کہ انٹرنیشنل کرکٹ میں اعلی معیار کی بولنگ کا سامنا اور فیلڈنگ کرتے ہوئے کمزوری عیاں ہوجائے گی۔ اگرچہ ان کی ٹائمنگ نیچرل ہے لیکن فٹ ورک میں مستعدی نہ ہونے کی وجہ سے ناکامی کا خدشہ ہوگا۔یاد رہے کہ اس سے قبل ہیڈ کوچ و چیف سلیکٹر مصباح الحق نے بھی شرجیل خان کی فٹنس پر سوالیہ نشان لگاتے ہوئے کہا تھا کہ مسلسل کام کرتے رہنے کی ضرورت ہوتی ہے، کوئی راتوں رات 15کلو وزن کم نہیں کرسکتا۔