شیریں مزاری نے فرانس سے متعلق بیان واپس لے لیا

ویب ڈیسک -
389

وفاقی وزیر برائے انسانی حقوق شیریں مزاری نے فرانس سے متعلق ٹوئٹ واپس لے لیا۔

وفاقی وزیر نے وضاحتی بیان میں لکھا کہ ٹوئٹ فرانسیسی سفارت خانے کی وضاحت کے بعد واپس لیا گیا۔

شیریں مزاری نے ایک خبر شیئر کی تھی اور ساتھ ہی تبصرہ بھی کیا تھا۔شیریں مزاری نے کہا میکروں وہی کررہے ہیں جو نازیوں نے یہودیوں کے ساتھ کیا تھا۔

خبر میں کہا گیا تھا کہ مسلمانوں کو فرانس میں شناختی نمبر دیے جائیں گے جس پر فرانسیسی وزارت خارجہ نے شیریں مزاری کے بیان ناقابل قبول قرار دیا۔

فرانسیسی سفارت خانے نے وضاحت کی کہ اخبار نے خبر میں درستی کردی ہے۔ شیریں مزاری نے سفارتخانے کی وضاحت کے بعد اپنی ٹوئٹ واپس لے لی۔

گزشتہ روز شیریں مزاری نے کہا تھا کہ ‘ایمانویل ماکرون مسلمانوں کے ساتھ وہی سلوک کر رہے ہیں جو نازیوں نے یہودیوں کے ساتھ کیا، جس میں نازی جرمنی میں یہودیوں کو بھی شناخت کے لیے اپنے لباس پر پیلے رنگ کا ستارہ پہننے پر مجبور کیا گیا تھا۔

فرانس کے وزیر خارجہ جان ایف جوڈریان نے وفاقی وزیربرائے انسانی حقوق شیریں مزاری کے بیان پر شدید ردعمل کا اظہار کرتے ہوئے کہا کہ یہ نفرت انگیز الفاظ اورصریح جھوٹ پر مبنی ہیں، نفرت اور تشدد کے نظریات سے دوچار ہیں۔

انہوں نے شیریں مزاری کے بیان کو بہتان قرار دیتے ہوئے سختی سے مسترد کردیا۔فرانسیسی وزیر خارجہ نے کہا کہ پیرس نے پاکستان کے سفارتخانے کو ان تبصروں کی شدید مذمت سے آگاہ کیا ہے۔ان مزید کہنا تھا کہ پاکستان کو ان بیانات کو واپس لینا چاہیے اور احترام کی بنیاد پر بات چیت کی راہ پر گامزن ہونا چاہیے۔

مزید خبریں