جماعت اسلامی پاکستان کے امیر سینیٹر سراج الحق نے سابق صدر آصف علی زرداری کے جانب سےسیاسی جماعتوں کے لیے رکھی گئی افطارڈنٹر کی دعوت میں شرکت سے معذرت کرلی ہے۔
ڈپٹی سیکرٹری اطلاعات کی جانب سے جاری بیان کے مطابق جماعت اسلامی کے مرکزی امیر سراج الحق مصروفیات کی وجہ سے آصف زرداری کے افطار ڈنر میں شرکت نہیں کریں گے۔
آصف زرداری کی جارحانہ تقریر کے بعد ملک میں سیاسی درجہ حرارت ایک بار پھر بڑھ گیا ہے ۔ سابق صدر کو ایک طرف تنقید کا سامنا ہے اور دوسری طرف وہ سیاسی رابطوں میں مصروف ہیں ۔
آصف زرداری نےاپنے بیان کے حوالے سے اعتماد میں لینے کیلئے حکومت سمیت تمام جماعتوں کے رہنماؤں کو آج افطار ڈنر پر مدعو کیا ہے ، تحریک انصاف ، اے این پی ، جے یو آئی اور ایم کیو ایم کو بھی دعوت دی گئی ہے ، سابق صدر نے ق لیگ کی قیادت اور محمود اچکزئی کو بھی مدعو کیا ہے۔
دوسری جانب تحریک انصاف کے چیئرمین عمران خان نے سابق صدر کی افطار ڈنر میں شرکت سے انکار کیا ہے جب کہ جمعیت علماء اسلام (ف) کے سربراہ مولانا فضل الرحمان کی افطار میں شرکت کا فیصلہ ان کی اسلام آباد میں آمد کے موقع پر ہوگا۔
