کراچی شہر کے مختلف اسپتالوں میں لو لگنے اور شدید گرمی سے جاں بحق ہونے والے افراد کی تعداد 700 سے تجاوز کر گئی ۔
تفصیلات کے مطابق جناح اسپتال میں تین روز کے درمیان گرمی سے جاں بحق ہونے والے افراد کی تعداد 280 ہو گئی ہے ۔ سول اسپتال میں گرمی کی شدت سے تین روز کے دوران 90 افراد لقمہ اجل بن گئے ۔ عباسی شہید اسپتال میں شدید گرمی سے 74 افراد اپنے خالق حقیقی سے جا ملے ۔ سندھ گورنمنٹ اسپتال نیوکراچی میں گرمی سے جاں بحق افراد کی تعداد 15 ہو گئی ہے ۔ قطراسپتال اورنگی میں 15 افراد گرمی کی شدت نہ برداشت کرتے ہوئے جاں سے ہاتھ دھو بیٹھے ۔ تین روز کے دوران لیاقت نیشنل اسپتال میں 25 افراد گرمی سے جاں بحق ہو گئے ۔ ضیاء الدین میں 25 اور انڈس اسپتال میں 43 افراد گرمی سے جاں بحق ہو گئے ۔ کے ایم سی اسپتال میں تین دن کے دوران ہلاکتوں کی تعداد 88 ہو گئی ۔ آغاخان اسپتال میں آج گرمی سے جاں بحق افراد کی تعداد 20 ہو گئی جبکہ این آئی سی ایچ میں 40 بچے 2 روز کے دوران انتقال کر گئے۔
