سری لنکا کے خلاف ون ڈے سیریز کے لیے پاکستان کی 16رکنی ٹیم کا اعلان کردیا گیا۔ان فٹ وہاب ریاض اور حارث سہیل اسکواڈ سے باہر ہوگئے ہیں جب کہ فٹسن مسائل سے چھٹکارا پانے والے فاسٹ بالر محمد عرفان کی واپسی ہوئی ہے۔
گیارہ جولائی سے شروع ہونے ون ڈے سیریز کے لیے پاکستانی ٹیم کی قیادت اظہر علی کریں گے جب کہ دیگر کھلاڑیوں میں احمد شہزاد،محمد حفیظ،مختاراحمد،محمد رضوان،بابر اعظم ، یاسرشاہ، محمد عرفان ، احسان عادل، شعیب ملک،راحت علی،بلال آصف، عماد وسیم،انور علی ،سرفرازاحمد اور اسد شفیق شامل ہیں۔
سری لنکا کے خلاف دوسرے ٹیسٹ میں زخمی ہونے والے وہاب ریاض ون ڈے سیریز کا حصہ نہیں تاہم چیف سلیکٹر ہارون رشید کا کہنا ہے کہ اگر وہاب ریاض جلد فٹ ہوجاتے ہیں تو انہیں ون ڈے اسکواڈ میں شامل کیا جائے گا۔
ورلڈکپ میں ان فٹ ہونے والے طویل قامت فاسٹ بالر محمد عرفان کی واپسی ہوئی ہے جب کہ حارث سہیل اور صہیب مقصود انجری کے باعث سیریز سے باہر ہیں۔
