سیکورٹیز اینڈ ایکسچینج کمیشن آف پاکستان نے سٹاک مارکیٹ میں رجسٹرڈ تمام ٹریڈنگ رائٹ سرٹیفکیٹ ہولڈرز کےلئے فنانشل رپورٹنگ کا ایک جامع اور آن لائن سسٹم جاری کر دیا ہے۔
ایس ای سی پی کے مطابق یہ اقدام سرمایہ کاروں کے تحفظ اور سٹاک مارکیٹ میں ٹریڈنگ کرنے والی کمپنیوں کی مالی حالت کی بہتر نگرانی کےلئے لیا گیا ہے۔ فنانشل رپورٹنگ کا یہ سسٹم تمام ٹریڈنگ رائٹ سرٹیفکیٹ ہولڈرز (TREC) کو پابند بناتا ہے کہ وہ اپنے سہ ماہی فنانشل ریٹرن ایس ای سی پی کی ویب سائٹ کے ذریعے تیس دن کے اندر اندر جمع کرائیں۔ اس سے پہلے بروکریج کمپنیاں اپنے فنانشل سٹیٹمنٹ سالانہ جمع کراتی تھیں۔
ایس ای سی پی کا کہنا ہے کہ ٹریڈنگ رائٹ سرٹیفیکیٹ ہولڈرکے پاس موجود سرمایہ، سرمایہ کاروں کی امانت ہوتا ہے اور وہ سرمایہ کاروں کی طرف سے سٹاک مارکیٹ میں ٹریڈنگ کرنے کی مجاز ہوتے ہیں۔ اس لئے ان کی جانب سے زیادہ سے زیادہ فنانشل رپورٹنگ کی ضرورت ہے۔ اسی کے پیش نظر اب ٹریڈنگ رائٹ سرٹیفیکیٹ ہولڈرز کے لئے کمپنی کی فنانشل رپورٹنگ کو سہ ماہی کر دیا گیا ہے۔
یاد رہے کہ 30 جون کو ختم ہونے والی سہ ماہی کےلئے فنانشل ریٹرن جمع کرانے کی آخری تاریخ 30 جولائی ہے۔ ایس ای سی پی کی جانب سے نئے فنانشل رپورٹنگ سسٹم کے استعمال اور اس سے آگاہی کےلئے کراچی لاہور اور اسلام آباد کی اسٹاک ایکس چینجز میں تربیتی ورکشاپس کا انعقاد بھی کیا گیا ہے۔
