مقبوضہ کشمیرمیں بھارتی فوجیوں نے اپنی ریاستی دہشت گردی کی تازہ کارروائیوں کے دوران منگل کو گاندربل اور راجوری کے اضلاع میں تین اور کشمیری نوجوانوں کو شہید کردیا ۔
کشمیرمیڈیاسروس کے مطابق دونوجوانوں کو آج صبح ضلع گاندربل میں شو ہامہ کے علاقے ہاڈورہ میں تلاشی اور محاصرے کی ایک کارروائی کے دوران شہید کیاگیا ۔ بھارتی فوج کے ترجمان کرنل منیش پانڈے نے دونوں نوجوانوں کو عسکریت پسند قراردیتے ہوئے کہاہے کہ انہیں ایک جھڑپ میں قتل کیا گیا ہے جبکہ آخری اطلاعات ملنے تک علاقے میں فوجی کارروائی جاری تھی ۔
تیسرے نوجوان کو راجوری کے علاقے سندربنی میں ایک پرتشدد فوجی کارروائی کے دوران شہیدکیاگیا ۔ادھر بھارتی فوجیوں نے سوپور قصبے میں آرم پورہ کے علاقے تیلیان محلہ میں کریک ڈاؤن آپریشن شروع کیا ۔دریں اثناء بھارتی پولیس نے بڈگام میں گھر پر چھاپے کے دوران کل جماعتی حریت کانفرنس کے رہنماء محمد یاسین عطائی کو گرفتار کرلیا۔
