جماعت اسلامی پاکستان کے سیکرٹری جنرل لیاقت بلوچ نے لاہور میں قصور کے وفد سے ملاقات میں کہاہے کہ وزیراعلیٰ پنجاب قصور سانحہ پر قائم جے آئی ٹی میں مظلوم خاندانوں کے وکلا اور مدعیوں کو پوری آزادی اور تحفظ سے کاروائی کا حصہ بننے کے لیے بااعتماد فضا دیں۔ سیاسی بااثر افراد مقامی پولیس کی پشت پناہی سے تحقیقات پر اثر انداز ہونے کی شیطانی کوشش کررہے ہیں۔ پنجاب حکومت بدنامی کے اس داغ کو اور زیادہ بدنامی کا باعث نہ بنائے۔ عوامی اور سماجی سطح پر سیرت و کردار سازی ،اسلامی نظریہ کی حفاظت اور ترویج ناگزیر ہے۔ انہوں نے کہاکہ جماعت اسلامی سانحہ قصور کے متاثرہ خاندانوں کو تنہا نہیں چھوڑے گی۔
دریں اثنا لیاقت بلوچ نے ریلوے مزدوروں کے وفد سے گفتگو کرتے ہوئے کہاکہ ریلوے کی کارکردگی مسلسل اچھی ہورہی ہے ۔ وفاقی وزیر خواجہ سعد رفیق، ریلوے انتظامیہ ، مزدور اور ہنر مند مبارکباد کے مستحق ہیں۔ پاکستان ریلوے کی کارکردگی بہتر اور خسارہ سے منافع کی صورت پیدا ہورہی ہے۔ حکومت اگر اپنی نیت نیک کرے تو پی آئی اے ، پاکستان اسٹیل ملز اور بجلی کمپنیاں بھی درست ہوسکتی ہیں۔ خسارہ ختم اور ادارے منافع بخش بن سکتے ہیں۔ انہوں نے کہاکہ قومی اداروں کی نج کاری کی بجائے قومی اداروں کی حفاظت اور مزدوروں ،ہنر مندوں اور درست پالیسی کے ذریعے اداروں کی اصلاح کی جائے۔
