اسلام آباد(آن لائن) عشق رسالتؐ پوری امت کا مشترکہ اثاثہ ہے اس کی ٹھیکیداری ہر گز نہیں تاہم ختم نبوت کی پہریداری اور چوکیداری ہم سب کا فرض ہے،فتوی صرف مستند مفتیان کرام ہی دے سکتے ہیں کسی کو اس پر قدغن کا کوئی حق حاصل نہیں،جہاد کی اجازت ریاست کا اختیار سہی لیکن ریاست کو اس ذمے داری کا احساس دلانا علماء کرام اور درد دل رکھنے والوں کا کام ہے،کفر کے فتوؤں پر پیچ و تاب کھانے کے بجائے کفریہ افکار و نظریات اور کفر کے فتاوی کے اسباب و محرکات کی روک تھام کی جائے ان خیالات کا اظہار وفاق المدارس العربیہ پاکستان کے جنرل سیکرٹری مولانا محمد حنیف جالندھری نے وفاقی وزیر داخلہ احسن اقبال کے بیان پر اپنے ردعمل کا اظہار کرتے ہوئے کیا۔انہوں نے کہا کہ عشق رسالتؐ اور محبت رسولؐ پوری امت کا مشترکہ اثاثہ ہے اور اس کی پہریداری اور چوکیداری ہر مسلمان کی ذمے داری ہے۔ ٹھیکیداری کا دعوی تو کسی نے نہیں کیا البتہ یہ نصیب کی بات ہے کہ محبت رسول ؐکے تقاضے کون نبھاتا ہے اور دشمنان رسول کا سہولت کار بن کر ختم نبوت سے متعلقہ شقوں پر شب خون کون مارتا ہے؟
مولانا جالندھری نے واضح کیا کہ فتوی جاری کرنا مستند مفتیان کرام کا کام ہے جبکہ ہر کس و ناکس کو فتوی دینے کا اختیار نہیں دیا جا سکتا اسی طرح کسی دارالافتاء اور مستند مفتی پر فتوی کے حوالے سے کسی قسم کی کوئی قدغن بھی نہیں لگائی جا سکتی مولانا محمد حنیف جا لندھری نے کہا کہ جہاد کا اعلان اگرچہ ریاست کی ذمے داری ہے لیکن ارباب اقتدار کو اس ذمہ داری کی طرف متوجہ کرنا اور ریاست کے اقتدار پر فائز ہو کر غیروں کے اشاروں اور مقاصد کی تکمیل کرنے والوں کو خبردار نہ کرنا بھی بدترین خیانت ہے۔مولانا جالندھری نے کہا کہ کسی پر کافر نہ ہونے کے باوجود کفر کا فتوٰی لگانا انتہائی خطرناک امر ہے لیکن ضرورت اس امر کی ہے کہ کفریہ عقائد و افکار کا پرچار کرنے والوں کو لگام دی جائے اور کفر کے فتاوی کے اسباب و محرکات کی روک تھام کی جائے تو فتوے خود بخود رک جائیں گے۔
