ایشز سیریز میں عمدہ کارکردگی کا مظاہرہ کر کے ٹیم کو فتوحات دلانے میں کردار ادا کروں، جیمز اینڈرسن

لندن(جسارت نیوز) اسٹار انگلش فاسٹ بولر جیمز اینڈرسن نے کہا ہے کہ آسٹریلیا کے خلاف اس کی سر زمین پر ایشز سیریز کھیلنے سے بڑھ کر کچھ نہیں، کوشش ہو گی کہ عمدہ کارکردگی کا مظاہرہ کر کے ٹیم کو فتوحات دلانے میں کردار ادا کروں۔ اینڈرسن کو انگلینڈ کی طرف سے زیادہ ٹیسٹ وکٹیں لینے کا اعزاز حاصل ہے۔ انہوں نے 500 سے زائد وکٹیں لے رکھی ہیں۔ اپنے ایک انٹرویو میں انہوں نے کہا کہ کینگروز کے خلاف ایشز سیریز کھیلنا پسند کرتا ہوں تاہم اس کے خلاف اس کی سرزمین پر کھیلنے کا مزہ ہی کچھ اور ہے، بطور سینئر بولر میری ہمیشہ کوشش ہوتی ہے کہ عمدہ کارکردگی کا مظاہرہ ٹیم کی کامیابی میں کلیدی کردار ادا کروں اور اس بار بھی میرا ہدف یہی ہو گا، انہوں نے کہا کہ نوجوان کھلاڑیوں کو میرا مشورہ ہے کہ وہ اس دورے سے لطف اندوز ہوں۔
انہیں چاہیے کہ وہ کسی طرح کا دباؤ نہ لیں، اگر کھلاڑی اعصاب کو قابو میں رکھ کر کھیلے تو کینگروز کیلئے ہماری ٹیم کو ایشز سیریز ٹائٹل کے دفاع سے روکنا بہت مشکل ہو گا۔