امریکا دہشت گردی کیخلاف پاکستان کی کوششوں کا اعتراف کرے، چین

بیجنگ (صباح نیوز) چین نے امریکی الزامات کو مسترد کرتے ہوئے زور دیا ہے کہ امریکا دہشت گردی کے خلاف جنگ میں پاکستان کی جانب سے کی جانے والی فعال کوششوں کا مکمل طور پر اعتراف کرے۔ چینی وزارت خارجہ کا کہنا تھا کہ پاکستان دہشت گردی کے خلاف جنگ میں ہراول محاذ پر ہے، کئی سال سے پاکستان دہشت گردی کو شکست دینے کی مسلسل کوششیں کر رہا ہے جس میں اس نے بہت قربانیاں دی ہیں، ہم سمجھتے ہیں کہ بین الاقوامی برادری پاکستان کی کوششوں کا مکمل اعتراف کرے۔ چینی وزارت خارجہ نے مزید کہا کہ چین دہشت گردی کے خلاف بین الاقوامی تعاون کو مضبوط اور کوششوں کو مربوط کرنے کے لیے عالمی برادری کی تائید کرتا ہے، ہم امید کرتے ہیں کہ پاکستان اور امریکا باہمی احترام کی بنیاد پر دہشت گردی کے خلاف جنگ میں ایک دوسرے سے تعاون کریں گے اور خطے و دنیا کی سلامتی و استحکام کے لیے مل جل کر کام کریں گے۔