آج کراچی کے مختلف علاقوں میں رینجرز اور پولیس نے کارروائیاں کرتے ہوئے 10 مبینہ ٹارگٹ کلرز سمیت 20ملزمان کو گرفتار کر لیا ۔ جبکہ فائرنگ کی مختلف وارداتوں میں 2 افراد جاں بحق اور ایک زخمی ہو گیا ۔
رینجرز نے ایم کیوایم کی کال پر زبردستی دکانیں بند کرانے والے 8 شرپسند ملزمان کو گرفتار کر لیا جن کے خلاف مقدمہ درج کر کے تحقیقات شروع کر دی گئی ہیں ۔ رینجرز نے ایک اور کارروائی میں 10 مبینہ ٹارگٹ کلرز کو گرفتار کر لیا ۔ترجمان سندھ رینجرز کے مطابق گرفتار ملزمان میں 4 کا تعلق کالعدم تنظیم ، 3 کا تعلق ایم کیوایم اور 3 کا حقیقی سے ہے ۔
منگھوپیر میں پولیس نے اسنیپ چیکنگ کے دوران دو ملزمان کو گرفتار کر کے جدید اسلحہ برآمد کر لیا ۔ پولیس نے ملزمان کے خلاف ایف آئی آر کاٹ کر تحقیقات کا آغاز کر دیا ۔ پولیس کے مطابق ملزمان اسٹریٹ کرائم کی متعدد وارداتوں میں ملوث ہیں ۔
کراچی کے علاقے اورنگی ٹاؤن میں رحمت چوک کے قریب نامعلوم افراد کی فائرنگ سے دو افراد جاں بحق ہو گئے ۔ پولیس نے پوسٹ مارٹم کے لئے لاشوں کو اسپتال منتقل کردیا ہے ۔ عینی شاہدین کا کہنا تھا ملزمان فائرنگ کے بعد آسانی سے فرار ہوگئے ۔
ریسکیو ذرائع کے مطابق کراچی کے علاقے لیاقت آباد انڈر پاس کے قریب نامعلوم افراد کی فائرنگ سے ایک شخص زخمی ہو گیا ۔ جس کو طبی امداد کے لئے قریبی اسپتال منتقل کر دیا گیا ہے ۔
