لاہور(وقائع نگار خصوصی)نائب امیر جماعت اسلامی پاکستان حافظ محمد ادریس نے اپنے ایک بیان میں کہاہے کہ آج پوری ملت اسلامیہ صلاح الدین ایوبی کی منتظر ہے ۔ اللہ کی رحمت و قدرت سے بعید نہیں کہ وہ مالک ارض و سما اس امت کو پھرایوبی اور غزنوی جیسے سپوت عطا فرمادے ۔ انہوں نے کہاکہ وزیراعظم پاکستان نے او آئی سی کے اجلاس میں مثبت جذبات کا اظہار کیاتھا ، اب عملاً بھی پاکستان کو ترکی اور دیگر مسلم ممالک کے ساتھ مل کر یہ معاملہ یو این او میں پوری جرأت و تیاری کے ساتھ اٹھانا چاہیے ۔ امت مسلمہ اپنے قبلہ اوّل کیخلاف ہر مذموم حرکت کا بھر پور مقابلہ کرے گی۔ ٹرمپ کا فیصلہ ان شاء اللہ مسلمانوں کو متحد کرنے کا ذریعہ بنے گا ۔ اس شر سے خیر برآمد ہوگا ۔ فلسطینی مسلمانوں نے پوری ایک صدی سے قربانیوں کی لازوال تاریخ مرتب کی ہے امریکا اور اس کا ناجائز بچہ اسرائیل ذلت و رسوائی سے دوچار ہوں گے ۔ انہوں نے کہ ترک صدر کی پکار پر پورے عالم اسلام کو لبیک کہتے ہوئے قبلہ اوّل کے تقدس کو ناپاک صیہونیوں اور ان کے سرپرستوں سے بچاناہوگا ۔ یہ دینی فرض ہے اور اس میں جو مسلمان ملک یا اس کی حکومت کوتاہی برتے گی ، وہ خدائے عظیم و برتر کے غضب کو دعوت دے گی۔
