پنجاب اور بلوچستان کے مختلف علاقو ں میں کارروائی، 3دہشتگرد گرفتار

راولپنڈی(مانیٹرنگ ڈیسک )سیکورٹی فورسز نے آپریشن رد الفساد کے تحت پنجاب اور بلوچستان کے مختلف علاقوں میں کارروائیاں کرکے 3 دہشت گردوں کو گرفتار جب کہ بھاری مقدار میں بارودی مواد برآمد کرلیا ہے۔آئی ایس پی آر کے مطابق ملک بھر میں دہشت گردوں کے خلاف آپریشن رد الفساد کامیابی سے جاری ہے۔ سیکورٹی فورسز نے خفیہ اطلاعات کی روشنی میں بلوچستان کے علاقے ٹوبہ نوخانی، ڈیرہ مراد جمالی، سنگ سلہ اور چبدار میں دہشت گردوں کے ٹھکانوں پر کارروائیاں کی اور اس دوران دھماکا خیزمواد، بارودی سرنگیں اور مواصلاتی آلات برآمد کرلیے۔دوسری جانب پنجاب رینجرز نے ڈیرہ غازی خان میں انٹیلی جنس اداروں کی اطلاعات پر کارروائی کرتے ہوئے 3 دہشت گردوں کو گرفتار کرلیا، گرفتار دہشت گردوں کے قبضے سے اسلحہ اور گولہ بارود بھی برآمد ہوا ہے۔