مقبوضہ کشمیر میں بھارتی فوج نہ صرف حد سے باہر نکل گئی ہے بلکہ تمام بین الاقوامی قوانین کو بھی پامال کرچکی ہے اور اگر بد معاش فوج کا لقب کسی کو دیا جانا چاہیے تو اس کی صحیح حق دار بھارتی فوج ہے۔ پاکستان اس مسئلے کا اہم ترین فریق ہے لیکن پاکستان کی جانب سے نہ تو سیاسی اور سفارتی محاذ پر بھارت کی گرفت مضبوطی سے کی جاتی ہے اور نہ عسکری محاذ پر اس کا گھیرا تنگ کیا جاتا ہے جس کی وجہ سے بھارتی افواج کی ہمت اس قدر بڑھ گئی ہے کہ وہ ہر روز احتجاج کرنے والوں کو براہ راست گولی کا نشانہ بنارہی ہے۔ ایسا لگ رہا ہے کہ بھارتی فوج روزانہ شکار پر نکلتی ہے اور دس بارہ کشمیریوں کو شہید کرکے اپنی گنتی پوری کرتی ہے۔ ادھر کشمیریوں کا حوصلہ ہے کہ بڑھتا ہی جارہا ہے اس کا اندازہ شہدا کے جنازوں سے ہوسکتا ہے۔ ہر شہید پاکستانی پرچم میں لپیٹا جاتا ہے اس سے پاکستان سے کشمیریوں کی محبت کی شدت کا اندازہ کیا جاسکتا ہے۔ بھارت زبردستی کشمیر پر اپنا قبضہ جمانے میں ناکام ہورہاہے۔ کشمیری کسی صورت بھارت کے ساتھ رہنے کو تیار نہیں اس لیے وہ ہر روز دس بارہ جوانوں کی قربانی دے رہے ہیں۔اب وقت آگیا ہے کہ سیاسی اخلاقی اور سفارتی حمایت سے بڑھ کر کچھ کیاجائے۔ بھارت کو جب تک جواب نہیں ملے گا وہ اوقات میں نہیں آئے گا۔
