بلوچستان کے علاقے اورماڑہ میں دہشت گردی کے نتیجے میں 14 افراد کے قتل پر پاکستان نے ایران سے شدید احتجاج کرتے ہوئے دہشت گرد تنظیموں کے خلاف کارروائی کا مطالبہ کردیا۔
تفصیلات کے مطابق وزارت خارجہ نے اسلام آباد میں قائم ایرانی سفارت خانے کو احتجاجی مراسلہ بھیجا جس میں کالعدم تنظیموں کے خلاف کاروائی کرنے کا مطالبہ کیا گیا۔
مراسلے کے مطابق 18 اپریل کو ایف سی یونیفارم میں ملبوس 15 سے 20 دہشت گردوں نے اورماڑہ میں گوادر کے قریب تین سے چار بسوں کو روکا اور مسافروں کو فائرنگ کرکے شہید کردیا جس میں پاک بحرایہ کے دو افسران بھی شامل تھے۔
واضح رہے کہ پاکستان پہلے بھی ایران کو کالعدم تنظیموں کے تربیتی کیمپوں اور سرحد پار لاجسٹک بیسز سے آگاہ کر چکا ہے اور اس حوالے سے انٹیلی جنس شیئرنگ بھی کی گئی ہے لیکن ایران ان دہشت گرد تنظیموں کے خلاف کوئی چارہ جوئی نہیں کی۔
