قومی کرکٹ ٹیم کے فاسٹ بالر محمد عامر نے کہا ہے کہ اسپاٹ فکسنگ میں پابندی ختم ہونے سے نئی زندگی ملی اب اس موقع سے فائدہ اٹھانا چاہتا ہوں اور مرحلہ وار بین الاقوامی کرکٹ میں واپسی کا خواہشمند ہوں۔
ایک انٹرویو میں محمدعامر نے اعتراف کیا کہ اسپاٹ فکسنگ اسکینڈل کی وجہ سے پانچ سالہ پابندی کا شکار ہونے کے بعد وہ کرکٹ کو تقریباً خیرباد کہہ چکے تھے تاہم اب وہ دوبارہ کرکٹ کے میدانوں میں اپنی کھوئی ہوئی ساکھ بحال کرنے میں مصروف ہیں۔
محمد عامر کا کہنا تھا کہ کرکٹ کے میدان میں واپسی کے بعد سے وہ شائقین کی جانب سے ملنے والی حوصلہ افزائی سے بہت خوش ہیں۔ اس کے ساتھ ساتھ یہ بھی سچ ہے کہ بہت سے لوگ ان کی واپسی پر خوش نہیں لیکن بطور کرکٹر ان کی ذمہ داری میدان پر کارکردگی دکھانا اور پاکستانی عوام کو مایوس نہ کرنا ہے۔
