پاکستان کی جانب سے اپنی ویزا پالیسی میں نرمی کے بعد آن لائن ویزے کے حصول کے لیے دنیا بھر سے مختلف ممالک کے ہزاروں شہریوں نے کوششیں شروع کردی ہیں اور 79 ہزار سے زائد آن لائن ویزے جاری کردیے گئے،
نیشنل ڈیٹا بیس اینڈ رجسٹریشن اتھارٹی (نادرا) کی جانب سے جاری اعلامیے کے مطابق غیرملکی شہریوں کی جانب سے ویزے کے حصول کے لیے مجموعی طور پر 89 ہزار سے زائد درخواستیں موصول ہوئی ہیں جن میں 24 ہزار درخواستیں صرف سیاحتی ویزے کے لیے کی گئی ہیں،
نادرا کے اعداد و شمار کے مطابق نادرا کو سیاحتی ویزے کے لیے 24 ہزار 878 درخواستیں موصول ہوئی ہیں،
آن لائن ویزے کے حوالے سے اعلامیے میں کہا گیا ہے کہ نادرا کو آن لائن ویزا ایپلی کیشن سسٹم کے ذریعے گزشتہ 6 ماہ کے دوران 89 ہزار788 درخواستیں موصول ہوئیں،
رپورٹ میں کہا گیا ہے کہ ان درخواستوں میں سے 79 ہزار620 غیر ملکیوں کو ا?ن لائن ویزا فراہم کر دیا گیا جبکہ دیگر 2 ہزار 988 درخواستوں کی جانچ پڑتال کی جارہی ہے،
نادرا کے مطابق غیرملکیوں کی جانب سے ویزے کے حصول کے لیے کی گئیں 3 ہزار966 درخواستیں مسترد بھی کی جاچکی ہیں،
بیان میں کہا گیا ہے کہ غیرملکیوں نے پاکستان میں سیاحت کے علاوہ کاروبار، مذہبی رسومات کی ادائیگی، مشنری، کوہ پیمائی، فیملی اور ثقافتی ویزوں کے لیے بھی درخواستیں دی ہیں،
خیال رہے کہ پاکستان نے ویزا پالیسی میں تبدیلی کرتے ہوئے 175 ممالک کے شہریوں کے لیے ویزا پالیسی نرم کرنے اور ا?ن لائن درخواستیں وصول کرنے کا اعلان کردیا،
پاکستان نے نئی ویزا پالیسی کے تحت 50 ممالک کو پاکستان پہنچتے ہی ایئرپورٹ پر ویزا جاری کرنے کا فیصلہ کیا تھا، 96 ممالک کو کاروباری غرض سے ویزے کی فہرست میں شامل کیا گیا تھا،
آئن لائن ویزے کی سہولت 175 ممالک کے شہریوں کو دی گئی ہے اور اس حوالے سے چین، ملائیشیا، ترکی، برطانیہ اور متحدہ عرب امارات کے لیے پائلٹ پروجیکٹ شروع کیا گیا تھا،
جنوری 2019 میں اس وقت کے وزیراطلاعات فواد چوہدری نے کہا تھا کہ پاکستان سیاحوں کے لیے جنت ہے اور اسی کو دیکھتے ہوئے نئی ویزا پالیسی متعارف کروائی جائے گی، جس کے تحت 175 ممالک کو ای ویزا، 50 ممالک کے لیے ویزا آن آرائیول کی سہولت ہوگی،
بعد ازاں 27 اپریل کو وزارت داخلہ نے نئی ویزا پالیسی جاری کرتے ہوئے کہا تھا کہ 48 ممالک کو ویزے میں نرمی کرتے ہوئے مخصوص وقت کے لیے ویزا فری کردیا گیا ہے،
وزارت داخلہ کے اعلامیے میں کہا گیا تھا کہ ایران، ملائیشیا، روس، ترکی، چین، سری لنکا، آسٹریلیا، ڈنمارک، برازیل، جرمنی سمیت دیگر ممالک کے لیے ویزا فری کیا گیا ہے، تاہم اس فہرست میں بھارت، امریکا، برطانیہ اور افغانستان شامل نہیں ہیں۔
وفاقی وزارت داخلہ کا کہنا تھا کہ نئی پالیسی کے تحت 48 ممالک میں سے 31 ممالک کے سفارت کاروں اور سرکاری پاسپورٹ رکھنے والوں جبکہ 5 ممالک کے شہری عام پاسپورٹ پر اس سہولت سے فائدہ اٹھا سکیں گے۔
