وفاقی محتسب برائے انسداد حراسانی کشمالہ طارق نے کہاکہ اگر کسی خاتون کو کوئی بار بار فیس بک ریکویسٹ بھیج رہا ہے تویہ حراساں کرنا ہے۔خاتون کے لباس کی تعریف بھی حراسیت ہے، ہر عورت کو کام کی جگہ عزت ملنی چاہیے۔
کشمالہ طارق نے چیمبرآف کامرس اینڈ انڈسٹری میں عالمی یوم خواتین کی مناسبت سے منعقدہ تقریب سے خطاب کرتے ہوئے کہاکہ اگر کسی خاتون کوکام کے اوقات کے بعد کوئی چائے یا کھانے پر بلا رہا ہے یا کوئی بار بار فیس بک ریکویسٹ بھیج رہا ہے تویہ حر اساں کرنا ہے،خواتین حراسانی کیخلاف محتسب برائے انسداد حراسانی سے رابطہ کر سکتی ہیں۔
انہوں نے کہا کہ میرا یقین ہے ہر دن ویمن ڈے ہے، ہم سارے خواتین کے حقوق کیلئے باہر آئے ہیں،ہر ادارے میں کوشش کرتے ہیں کہ خواتین کی نمائندگی کو پروموٹ کریں ان کو کام کی جگہ عزت ملے،خواتین انسدادحراسانی محتسب میں آن لائن شکایت کر سکتی ہیں۔
اگرکسی خاتون کوکام کے اوقات کے بعد کوئی چائے یا کھانے پر بلا رہا ہے تو اسکی شکایت خواتین انسداد حراسانی محتسب کو کریں،خاتون راستے میں جا رہی ہے اس کے لباس کی کوئی تعریف کرتا ہے تو یہ بھی حراسیت ہے۔
کشمالہ طارق نے کہاکہ دو مہینے کے اندر انسدادحراسانی محتسب فیصلہ کرتا ہے،جب محتسب بنی تو مہینے میں پانچ کیسز آتے تھے اب 12 گنا کام بڑھ گیا ہے،جس ادارے میں حراسانی محتسب کا کوڈ آف کنڈکٹ نہیں ہو گا انہیں ایک لاکھ تک جرمانہ کریں گے۔
