جماعت اسلامی ہی نظریہ پاکستان کی آبیاری کر رہی ہے‘ حافظ ادریس

لاہور (نمائندہ جسارت)نائب امیر جماعت اسلامی پاکستان حافظ محمد ادریس نے بنگلا دیش میں پاکستان کی محبت کے جرم میں پھانسی کی سزا پانے والے میر قاسم علی شہید کی یاد میں منصورہ میں منعقدہ تعزیتی ریفرنس سے خطاب کرتے ہوئے کہاکہ حسینہ واجد کا ظلم و جبر اپنی آخری حدوں کو چھو رہاہے ۔ میر قاسم علی سمیت جماعت اسلامی کے قائدین کو کسی اخلا قی جرم کی پاداش میں نہیں بلکہ متحدہ پاکستان کی حفاظت کے ’’جرم ‘‘میں پھانسیاں دی گئیں۔ انہوں نے کہاکہ بنگلادیش میں قید و بند کی صعوبتیں برداشت اور اپنی جانوں کا نذرانہ پیش کرنے والوں نے 45 سال بعد بھی گواہی دی ہے کہ جماعت اسلامی ہی نظریہ پاکستان کی آبیاری کے
لیے خون کے نذرانے پیش کر سکتی ہے ۔انہوں نے کہاکہ ہمارے حکمران خاموش تماشائی بنے ہوئے ہیں اور اس ظلم کے خلاف انہو ں نے کسی عالمی فورم پر آواز بلند نہیں کی ، حالانکہ یہ جماعت اسلامی کا نہیں ، پاکستان کا مسئلہ ہے ۔ انہوں نے کہاکہ جماعت اسلامی اس ظلم کے خلاف ہر عالمی فورم پر آواز بلند کرے گی ۔