ملک بھر میں پاک فضائیہ نے تمام ائر بیسز پریوم شہد امنایا

اسلام آباد+کراچی (اے پی پی+ اسٹاف رپورٹر) ملک بھر میں پاک فضائیہ نے اپنے تمام فضائی مستقروں (ائر بیسز) پر بدھ کو یوم شہدا منایا۔ ائر ہیڈ کوارٹرز اسلام آباد میں ایک سادہ مگر پر وقار تقریب منعقد کی گئی جس میں پاک فضائیہ کے سربراہ ائر چیف مارشل سہیل امان نے شہداکی یادگار پر پھولوں کی چادر چڑھائی اور فاتحہ خوانی کی۔ تقریب میں پرنسپل اسٹاف آفیسرز اور ائر مین کی ایک بڑی تعداد نے شرکت کی۔ دن کا آغاز1965 اور 1971 کی جنگوں کے پاک فضائیہ کے شہداء اور ان تمام افراد کے لیے خصوصی دعاؤں اور قرآن خوانی سے کیا گیا، جنہوں نے پاکستان کے معرض وجود میں آنے سے لے کر اب تک پاکستان کے لیے اپنی جانیں قربان کیں۔اسی طرح پا ک فضائیہ کے ایک دستے نے ائر وائس مارشل سلمان احسن بخاری، ائر آفیسر کمانڈنگ ،سدرن ائر کمانڈ کی سر کردگی میں پاک فضائیہ کے سربراہ ائر چیف مارشل طاہررفیق بٹ کی جانب سے پائلٹ آفیسرراشد منہاس شہید (نشانِ حیدر) کی قبر پر فاتحہ خوانی کی اور پھولوں کی چادر چڑھائی۔ ملک بھر میں پاک فضائیہ کے شہداء کی قبروں پر بھی پھولوں کی چادریں چڑھائی گئیں۔ علاوہ ازیں کراچی میں بھی یوم پاک فضائیہ کے موقع پر پاکستان ائر فورس کے دستے نے شہید راشد منہاس کی قبر پر حاضری دی اور پھول چڑھائے اور سلامی پیش کی جبکہ شہدا کیلیے فاتحہ خوانی بھی کی گئی۔ یومِ فضائیہ کے موقع پر نشان حیدر کا اعزاز حاصل کرنے والے سب سے کم عمر پائلٹ آفیسر راشد منہاس کی قبر پر کمانڈنگ آفیسر سدرن کمانڈ ائر وائس مارشل سلمان احسن بخاری کی قیادت میں پی اے ایف کے دستے نے پاک فضائیہ کی جانب سے فاتحہ خوانی کی ،پھولوں کی چادر چڑھائی اور نوجوان پائلٹ کی قربانی کو خراج عقیدت پیش کیا ۔