خلا سے متعلق دلچسپ معلومات

انسان جب آسمان کی جانب نظر اُٹھاتا ہے تو اُسے سیارے بھی دکھائی دیتے ہیں اور ستارے بھی لیکن دونوں چیزیں بظاہر ایک جیسی ہی لگ رہی ہوتی ہیں اور انسان کو پتہ نہیں چلتا جب تک وہ دوربین یا کسی اچھے کیمرے سے زوم کرکے نہ دیکھ لے۔ انسان ازل سے ہی خلا کو سمجھنے اور اُس میں موجود اشیاء کی معلومات حاصل کرنے کا خواہشمند رہا ہے اور اپنی استطاعت کے مطابق اس میں کافی حد تک کامیاب بھی ہوگیا ہے۔ ذیل میں خلا سے متعلق چند دلچسپ حقائق پیش کئیے جارہے ہیں۔

٭: عطارد اور زہرہ نظام شمسی کے دو ہی سیارے ہیں جن کے چاند نہیں ہیں۔ ایک اندازے کے مطابق ہمارے نظا م شمسی میں کل 176 چاند ہیں جو مختلف سیاروں کے گرد گھومتے رہتے ہیں۔ ان میں سے کچھ عطارد سے بھی بڑے ہیں۔

٭: اگر کوئی ستارہ بلیک ہول کے قریب سے گزرے گا تو ٹکڑے ٹکڑے ہو جائے گا۔ ماہرین فلکیات 20 برس تک ایک ستارے کا مشاہدہ کرتے رہے جو ہماری کہکشاں میں ایک بلیک ہول کے گرد چکر لگا رہا تھا۔ پھر یہ ستارہ بلیک ہول کے بہت قریب آ گیا اور بالآخر تباہ ہو گیا۔

٭: ہمارے نظام شمسی کا سب سے گرم سیارہ زہرہ ہے ۔ بہت سے لوگ خیال کرتے ہیں کہ یہ عطارد ہو گا کیونکہ وہ سورج کے سب سے قریب ہے۔ دراصل زہرہ کی فضا میں بہت سی ایسی گیسیں ہیں جو ’’گرین ہاؤس ایفکٹ‘‘ پیدا کرتی ہیں۔ اس کی وجہ سے وہاں کا درجہ حرارت 462 سینٹی گریڈ رہتا ہے۔