بھارت کا کشمیرکو اندرونی تنازع کہنا افسانہ ہے‘ امریکی تھنک ٹینک

واشنگٹن (اے پی پی) واشنگٹن میں قائم تھنک ٹینک ”یو ایس انسٹی ٹیوٹ آف پیس“ نے جموں و کشمیر کو مکمل طور پر بھارت میں ضم کرنے اور اسے مرکز کے زیر انتظام 2 علاقوں میں تقسیم کرنے کے بھارتی حکومت کے اقدام
پر سخت تشویش کا اظہار کیا ہے۔ کشمیر میڈیا سروس کے مطابق ”یو ایس انسٹی ٹیوٹ آف پیس“ نے اپنی ایک رپورٹ میں کہا ہے کہ 5 اگست 2019ءکے بھارتی فیصلے نے کشمیریوں کے اندر پہلے سے موجود غم وغصہ بڑھا دیا ہے جو مزید تلخی اختیار کرے گا۔ رپورٹ میں کہا گیا کہ بھارت کو کشمیر میں قیام امن کے لیے آئینی اور سیاسی تبدیلی سے متعلق اپنے بیانیے کا دفاع کرنے میں سخت مشکل کا سامنا ہے۔ رپورٹ میں کہا گیا کہ اگست 2019ءکے فیصلے کے بعد کشمیر میںتشدد کے واقعات عروج پر ہیں‘بھارتی حکومت کا کشمیرکو اپنا اندرونی مسئلہ قرار دینا محض ایک افسانہ ہے اور اس افسانے کی بنیاد جموں و کشمیر میں بڑی تعداد میں بھارتی فورسز کی موجودگی پر کھڑی ہے۔