کراچی (نمائندہ جسارت ) کراچی میں واقع کیماڑی آئل ٹرمینل میں بم دھماکا۔، دھماکا پائپ لائن میں نصب کیے گئے بارودی مواد کی وجہ سے ہوا، 3 افراد زخمی۔ تفصیلات کے مطابق کراچی کے علاقے کیماڑی میں واقع آئل ٹرمینل کو دہشت گردی کا نشانہ بنانے کی کوشش کی گئی ہے۔ بتایا گیا ہے کہ پیر کی شام کو کیماڑی آئل ٹرمینل میں بم دھماکا ہوا۔دھماکے کے نتیجے میں 3 افراد زخمی جبکہ ایک آئل ٹینکر مکمل تباہ ہوگیا ہے۔ زخمیوں کو فوری طور پر ہسپتال منتقل کر دیا گیا۔ بتایا گیا ہے کہ دھماکے کی شدت بہت زیادہ تھی جس کے باعث زمین لرز اٹھی۔ دھماکے کی آواز کئی کلو میٹر تک سنی گئی۔ دھماکا آئل ٹرمینل گیٹ نمبر چارکے قریب ہوا جس کے بعد وہاں آگ بھڑک اٹھی۔ دھماکے کے بعد ریسکیو کارروائیوں کا آغاز کر دیا گیا۔ریسکیو اہلکاروں کی جانب سے آگ بجھانے کی کوشش کی جا رہی ہے۔ جبکہ سیکورٹی اہلکاروں نے علاقے کو گھیرے میں لے لیا ہے۔ بتایا گیا ہے کہ دھماکا پائپ لائن میں نصب کیے گئے بارودی مواد کے پھٹنے کی وجہ سے ہوا۔ شر پسند عناصر کی جانب سے بارودی مواد پائپ لائن کیساتھ نصب کر کے دھماکا کیا۔ تاحال کسی نے اس دھماکے کی ذمے داری قبول نہیں کی۔
