وزارت خارجہ کو نوازشریف کے ناقابل ضمانت وارنٹ پر عملدرآمد کا حکم

لاہور(نمائندہ جسارت) احتساب عدالت نے پلاٹ الاٹمنٹ ریفرنس میں وزارت خارجہ کو نواز شریف کے ناقابل ضمانت وارنٹ پر عمل درآمد کرانے کا حکم دے دیا۔ لاہور کی احتساب عدالت کے جج اسد علی نے غیر قانونی پلاٹ الاٹمنٹ ریفرنس کی سماعت کی۔ نیب کی طرف سے اسپیشل پراسکیوٹر حارث قریشی پیش ہوئے۔دوران سماعت ماڈل ٹاؤن پولیس اسٹیشن کے انسپکٹر بشیر احمد نے نواز شریف کے وارنٹ گرفتاری کی رپورٹ پیش کر دی جس میں کہا گیا کہ نواز شریف اپنی ماڈل ٹاؤن کی رہائش گاہ پر موجود نہیں ہیں، ان کی رہائشگاہ پر مسلم لیگ (ن) کے رہنما عطاء تارڑ نے ملزم کے بیرون ملک ہونے کی تصدیق کی۔ انہوں نے بتایا کہ ملزم 6 ماہ سے بیرون ملک ہیں۔اسپیشل پراسکیوٹر نیب نے عدالت سے استدعا کی کہ ملزم میاں نواز شریف کے ناقابل ضمانت وارنٹ گرفتاری جاری کیے جائیں، ملزم میر شکیل کیخلاف فرد جرم عائد کر کے ٹرائل جلد شروع کیا جائے۔عدالت نے نواز شریف کے ناقابل ضمانت وارنٹ گرفتاری جاری کرتے ہوئے وزارت خارجہ کو لندن میں پاکستانی ہائی کمیشن کے ذریعے نواز شریف کے ناقابل ضمانت وارنٹ پر عمل درآمد کروانے کا حکم دے دیا۔واضح رہے کہ نواز شریف گزشتہ کئی ماہ سے لندن میں اپنے علاج کی غرض سے مقیم ہیں۔